قائد سلاح المدرعات يدلي بافادات مثيرة ، ويكشف اسماء من اجهضوا العملية الانقلابية من داخلها.

الرقيب اول مظلات بشير احمد بدوي اسماعيل : “الملطشة الحاصلة لجيشنا حاره ما بتنبلع ونحن وصلنا عمر لا نقدر ننكر الكاكي ده ولا نعيش بلاهو “

المساعد حماد تاور: لو رجعتونا وحداتنا جاهزين تاني نتحرك والله ما نقيف الا ترجع للكاكي هيبته

خاص مونتي كاروو-11-10-2022
واصلت محكمة انقلاب المدرعات جلساتها برئاسة اللواء الركن عباس محمد عثمان وكامل عضويتها واكملت استجوابها لرئيسي لجنة التحقيق اللواء عباس معتصم واللواء ابراهيم جالي من قبل هيئة الاتهام وهيئة الدفاع، واستدعت شهود الاتهام الذين قامت ادارة الاستخبارات مع ممثل الاتهام باخطارهم رسميا للحضور من الجلسة السابقة، وذلك بعد ان اكملت المحكمة سماع اقوال ضباط الصف الاخرين:
محمد ابراهيم حسن الملك ، محمد حامد اسماعيل عبد الله ، احمد حسان احمد محمد ، حامد محمد سليمان جمعة ، عبد الله عبد الله ابكر النور ، مصطفي ابراهيم اسماعيل يعقوب ، اسماعيل محمد اسماعيل المنا ، حماد احمد تاور ابراهيم ، الصديق الدومة الضوء ابراهيم ، رقيب اول سليمان عبد الساوي سليمان ، رقيب اول خالد عبد الله خلف الله سليمان ، رقيب اول النور حامد عبد الله ماهل ، رقيب اول بشير احمد بدوي اسماعيل ، رقيب اول محمد احمد الهادي عبد الرحمن  ، رقيب سامي النعمة يوسف ، رقيب محمد الفضل محمد احمد ، رقيب هالي معتصم طه محمد ، رقيب محمد سعد صلوحة سعيد ، رقيب فرح عبد الله فرح الدور اندل ، رقيب محمد احمد الهادي عبد الرحمن ، عريف حمدنا الله عبد القادر محمد المصطفي ، جندي مكاوي ادم حركة الفضيل ، جندي ياسين امين الباهي كرار

وستفرد مونتي كارو في نشراتها القادمة ملخص الافاداة المفصلة لكل ضابط صف منهم نظرا لصعوبة الحصول على كل التفاصيل، لكن جاءت مجمل اقوالهم مطابقة لكلام السابقين.

مرمطة الجيش

لكن جدير بالاشارة نقل ملخص اقوال الرقيب اول مظلات بشير احمد بدوي اسماعيل الذي افاد هيئة لجنة التحقيق انه لا يعرف غير العميدين ماهر والعميد ابراهيم المنصوري ولم يكن يعلم ان هناك عمل انقلاب منظم فقد كان في قوة المناوبة ليلتها ثم حضر قائد الجناح المظلي والضابط العظيم وسمع منهم ان هناك عملا يستهدف تصحيح مسار البلاد، واضاف : ” والله يا سعادتك الحقيقة انا كنت قرفان من نفسي وبشعر بخجل شديد وانا اشوف جنودي قدامي واولادي في البيت والاهل وحال البلد زي الزفت انا دخلت العسكرية دي زمن كان فيها رجال ناس العميد كمال علي مختار واللواء عبد الحميد ورجال يملاو العين والله جندي المظلات او الفدائي لما كنا ندربه ويلبس البوريه الاحمر والقاش الاحمر المروي بالدم يمشي في الشارع يلفت النظر وينشر الطمأنينة وسط المواطنين زيه زي الطالب الحربي الناس تشوف فيه هيبة الجيش ,,, الليلة الملطشة الحاصلة لجيشنا دا حاره وا

لو رجعتونا وحداتنا جاهزين تاني نتحرك
المساعد حماد احمد تاور قال انه كان في قوة الاستعداد ثم جاء العريف (..) حكمدار الخدمة وساله عن الحاصل وعن تحريك القطع الالية واعادة الانتشار للجنود وقال لي ” جنابو هل في كبسة“؟؟ فانا نهضت ثم قمت من مكاني وانتظمت ومشيت الرئاسة ولقيت الضابط العظيم ولما ذكر لي اسماء القادة المتحركين انا بدون ما اشعر دقيت كراعي وقلت انا قدام وجاهز وفعلا رجعت سلحت العساكر بتاعيني وخليتهم جاهزين في انتظار التعليمات، بعدا قالوا كما كنت وووقفت وسلمت عهدتي بلا شق ولا طق، والحمد لله عساكري كانوا مثال للنظام وانا مسئول عنهم مافي زول تحرك الا بتعليمات مني وما في زول مسئول في القوة بتاعتي الا انا والضابط الاعلي مني ولو عندكم كلام اسالوووني انا العساكر اللي تحتي ما لهم علاقة هم بس نفذو التعليمات..

وفي سؤال عن الدوافع، بالله يا سعادتك شوف انحن خدمتنا كم سنة وعشنا عمرنا قدر شنو وقدمنا شنو للمؤسسة دي وللجيش وما لقينا شئ لو علي القروش القروش ما بتعوض التعب ولا الصحة ولا الفات من العمر لكن علي الاقل كلمة شكر ما نسمعها كل يوم شتيمة شتيمة وبهدلة بهدلة واساءات لنا من عيال هم اولادنا وتشويه سمعتنا وفي الاخير مرمطة للميري وكل زول يوزع علاماته بالله دي حالة يسكت عليها راجل؟؟!! اذا في الجيش دا في زول عنده قلب حار وراجل راجل ود رجال يسكت علي كدا ؟ ولو تحركنا عشان نعيد هيبة الكاكي اللي بقي ملطشة دا يقولوا متهمين ومذنيبن ؟؟ لو دا ذنب انا مذنب ودينا الدروة وين نمشي لا سكتها بدون محكمة ولا انتظار انحن دافعنا هو جيشنا وبلدنا مافي جيش بدون هيبة ولا في بلد بدون جيش بتمشي صاح… لو رجعتونا وحداتنا جاهزين تاني نتحرك والله ما نقيف الا ترجع للكاكي هيبته ويمشي العسكري بتاعنا في الشارع مرفوع الراس والشعب يرجع يحترمه

قادة الانقلاب وتقويض النظام الدستوري
بعد انتهاء اقوال المتهمين اخذت المحكمة عشرة دقيقة صفا ثم عادت تبدا في سماع اللواء عباس معتصم واللواء ابراهيم جالي الذين افادا هيئة المحكمة انهما لم يجدا في فترة التحقيق مع الموقوفين او الشهود اي افادات او نوايا علي تهمتي تقويض النظام الدستوري حيث لم يثبت علي اي من قادة التحرك انه كانت لديه نوايا لتقويض الوثيقة الدستورية او تعطيل نظام الضبط والربط في القوات المسلحة باعتقال رئيس هيئة الاركان او نائبه او قادة اي وحدة، بل ان تنفيذ التحرك كان اقرب لعملية تامينية وتوصيل صوت احتجاج للقيادة، ولم يثبت ان اي من الضباط او ضباط الصف قد امر جنوده بضرب ذخيره حية او تقييد حركة القادة او التمرد علي المرؤسيين الاعلى..

وعند سؤال رئيس المحكمة لرئيسي لجنة التحقيق اللواء معتصم عباس واللواء جالي افادا بانهم لم يأمرا باخذ اي اعتراف قضائي لا من الضباط المتهمين ولا من ضباط الصف لانه لم يكن هناك حوجة لشئ مثل هذا وعليه قام رئيس المحكمة باستبعاد الاعتراف القضائي الذي تم تسجيله لاربعة ضباط وخمسة ضباط صف ورفض ضمه لملف القضية كما رفض ضم قائمة اسماء مقرونة مع شرائح اتصالات اريبا جاءت بها هيئة الاتهام وطلبت ضمها للقضية..
وفي سياق متصل استمعت المحكمة الي افادة من شاهد الاتهام الاول اللواء الركن احمد صالح عبود قائد سلاح المدرعات بالشجرة والذي ادلي بشهادة مثيرة وكشف اسماء من اجهضوا العملية الانقلابية من داخلها.سنوالي نشرها لاحقا….
ونواصل
خدمة الاخبار الخاصة من #مونتي_كاروو